➠ తెలుగుప్రజలకు కార్తికం అనగానే భక్తిటివి కోటిదీపోత్సవం స్ఫురణకు వస్తుంది. హైదరాబాద్ లోని ఎన్టీఆర్ స్టేడియం వేదికగా ఏర్పాటు చేసే కోటి దీపోత్సవ ప్రాంగణం... ఉత్సవం జరిగినన్ని రోజులూ సంధ్యవేళ ఓ కాంతివనంలా గోచరిస్తుంది. ఇక్కడ భక్తజనులు వెలిగించే ప్రతి దివ్వె మహాదేవుని కాలిమువ్వ అవుతుంది. రచన టెలివిజన్ ప్రైవేట్ లిమిటెడ్ అధినేత నరేంద్ర చౌదరి, రమాదేవి దంపతుల సత్సంకల్పంతో కోటి దీపోత్సవం అత్యంత వైభవంగా రూపుదిద్దుకుంది. 2012 నుంచి నిరాటకంగా కొనసాగుతూ వస్తోంది. కరోనా కష్టకాలంలో ఈ ఏడాది కూడా మరోసారి భక్తులకు ఆనందోత్సాహాలను పంచిపెట్టింది. ఇందులో వేలాదిమంది ప్రత్యక్షంగా పాల్గొన్నారు. కోటిదీపాలలో తమవంతు దీపాలను వారే స్వయంగా వెలిగించి, దర్శించి, నమస్కరించి తన్మయులయ్యారు. కాగా టివి మాధ్యమంగా ప్రపంచవ్యాప్తంగా కోట్లాదిమంది వీక్షించి, ఆనందించి, ఆశీర్వదించారు.

➠ పరమశివుని మహదవతారమైన శ్రీ కాలభైరవస్వామి ఆవిర్భవించిన పవిత్రదినం మార్గశిర బహుళ అష్టమి. దీనినే కాలభైరవాష్టమి అని వ్యవహరిస్తారు. కాలభైరవుని ప్రస్తావన లేని శివపురాణాలు, గాథలు లేవని చెప్పవచ్చు. చాలా శివక్షేత్రాలకు క్షేత్రస్వామి కాలభైరవుడే.

➠ శ్రీకాళహస్తిలో ఏడుగంగల జాతర ప్రతి ఏడాది కోలాహలంగా జరుగుతుంది. ఏడు ప్రధాన వీధులలో ఏడు గంగలు కొలువు దీరుతాయి. ప్రతి ఇంటిలోనూ పోలేరమ్మ కొలువు తీరుతుంది. కుంభాలలో వెలిగించిన దీపాలతో ముత్తయిదువలు గంగమ్మల వద్ద మొక్కులు తీర్చుకుంటారు. కులవివక్ష లేకుండా పరిసర ప్రాంత ప్రజలందరూ విశేష సంఖ్యలో జాతరలో పాలు పంచుకుంటారు. కరోనా నేపధ్యంలో జాతర నిర్వహణలో మార్పు చేర్పులుంటాయి.

➠ అరటిదొప్పలో వెలుగుతున్న దీపాన్ని ప్రవహించే నీటిలో విడిచిపెట్టే పర్వం తెలుగు మహిళలు ఆచరించే పోలిస్వర్గ దీపం. మార్గశిర శుద్ధ పాడ్యమి నాటి తెల్లవారుజామున నదీతీరాలన్నీ పుణ్యస్నానాలు ఆచరించే, దీపాలు విడిచే మహిళామణులతో నిండిపోతాయి. పోలిస్వర్గ దీపం వెనుక ఆసక్తి దాయకమైన కథ, వివరాలు.

➠ దత్తాత్రేయస్వామి పరిపూర్ణజ్ఞానమూర్తి. బ్రహ్మ, విష్ణు, మహేశ్వరుల ఏకత్వాన్ని సూచించే స్వరూపం. త్రిమూర్తుల ప్రత్యక్ష అంశంతో జన్మించినవాడు. స్థూల, సూక్ష్మ, కారణాలనే దేహత్రయాన్ని త్యజించిన కారణంగా (దత్తము అంటే త్యజించటం అనే అర్థం ఉంది) దత్తుడయ్యాడు. నిరంతర చైతన్య స్వరూపుడు. జాగ్రత్, స్వప్న, సుషుప్తి అనే అవస్థాత్రయం లేనివాడు. సత్వ,రజ, తమో గుణాలకు అతీతుడైనవాడు. అకార, ఉకార, మకారాల సంయోగమైన ఓంకారానికి మూలస్వరూపుడు. మొత్తంగా సత్య జ్ఞానానందమూర్తి. అన్నిటికన్నా మిన్నగా పరబ్రహ్మ తత్త్వమూర్తి దత్తాత్రేయస్వామి. 

➠ ఏలోరెంబావై అనేది మేలుకొలుపు. ధనుర్మాసంలో తరచుగా వినబడుతుంది. వైష్ణవులకు, శైవులకు కూడా పవిత్రమాసం ధనుర్మాసం. ఈ మాసంలో ఆలయాల్లో నిర్వహించే సుప్రభాత సేవల్లో వైష్ణవులైతే తిరుప్పావై, శైవులైతే తిరువెంబావై గానం చేస్తారు. మాణిక్యవాచకర్ రచించిన తిరువెంబావైలో మొత్తం ఇరవై పాశురాలుంటాయి. తిరువెంబావై మంత్రమయము, మహిమాన్వితమని పెద్దలు చెబుతారు. ఇరవై పాశురాల తిరువెంబావై అర్థనారీశ్వర తత్త్వాన్ని కవితాత్మకంగా చెబుతుంది. జగత్తంతా శివమయమని ప్రబోధిస్తుంది. శక్తిసమేతుడైన శివుని ఆరాధించి తరించమని సందేశమిస్తుంది.