➠ ఆసియా ఖండంలోనే అతిపెద్ద గిరిజన జాతర మేడారం సమ్మక్క, సారలమ్మ జాతర.. ములుగు జిల్లాలో జరిగే మేడారం జాతరకు దేశ నలుమూలల నుంచే కాకుండా విదేశాల నుంచి కూడా భక్తులు తరలివస్తుంటారు. అందుకే ఈ జాతరకు తెలంగాణ కుంభమేళా అనే పేరుకూడా ప్రసిద్ధి. జాతర సమయంలో వనదేవతలు సమ్మక్క-సారలమ్మను పూజించేందుకు లక్షలాది భక్తులు తరలివస్తారు.

➠ ఏడాదిలో వచ్చే పవిత్రమైన నాలుగు మాసాల్లో మాఘం ఒకటి. ఆషాఢం, కార్తికం, మాఘం, వైశాఖం అనే ఈ పరంపరలో కార్తికం, మాఘం స్నానాలకు ప్రసిద్ధి. మాఘమాసంలో సముద్రస్నానం, నదీస్నానం తప్పనిసరిగా చేస్తుంటారు. కార్తికంలో దీపవ్రతాలు చేసినట్లే, మాఘంలో స్నానవ్రతం చేయడం పురాణ ప్రసిద్ధంగా కనిపిస్తోంది. మాఘపౌర్ణమిని మనవారు మహామాఘి అంటారు. 

➠ భీష్ముడు తన బ్రహ్మచర్య వ్రతంతో, త్యాగనిరతితో లోకప్రసిద్ధిని పొందాడు. విష్ణు సహస్రనామాన్ని జగత్తుకు అందించాడు. అందరికీ ఆచార్యుడయ్యాడు. అష్టవసువులలో చివరివాడైన ఆయన పేరుతో జరుపుకునే భీష్మ ఏకాదశి పరమ పవిత్రమైనది. ఈ ఏకాదశినాడు విష్ణుపూజ, ఉపవాస నియమాదుల ఆచరణతో పాటుగా భీష్మ పితామహుని కూడా అర్చించాలి.

➠ మాఘమాసంలో అమావాస్యకు ముందురోజు శివరాత్రి వస్తుంది. అన్ని పండుగల్లోనూ చిట్టచివరిది మహాశివరాత్రి. ఆడంబరాలు, ఆర్భాటాలు లేని ఒకేఒక్క పండుగ శివరాత్రి. జన్మమొత్తంమీద ఒక్కసారి అభిషేకం చేసినా, శివపూజ చేసినా మోక్షాన్ని అనుగ్రహించేది మహాశివరాత్రి.

➠ మహాశివరాత్రికి శివాలయాలన్నీ భక్తజన సంద్రాలవుతాయి. కంచిలో మాత్రం శివరాత్రికి పదిహేను రోజులముందునుంచే లోకాలనేలే జగన్మాత అయిన కామాక్షీదేవికి అద్భుతరీతిలో బ్రహ్మోత్సవాలు జరుగుతాయి. ఆ సందర్భంగా ప్రతి ఉదయం, సాయంత్రం వేళల్లో కంచి కామాక్షీదేవి మనోహరమైన వాహన సేవలందుకుంటూ భక్తకోటిని అనుగ్రహిస్తుంది. 

➠ కేవలం శిఖర దర్శనం చేసుకుంటే చాలు పునర్జన్మ ఎత్తవలసిన అవసరం లేకుండా చేసే దివ్యక్షేత్రం శ్రీశైలం. మహాశివరాత్రి సందర్భంగా ఈ క్షేత్రంలో బ్రహ్మోత్సవాలు నిర్వహిస్తారు. శివరాత్రినాటి లింగోద్భవకాలం తరువాత శివపార్వతుల కల్యాణం జరుగుతుంది.