➠ చాంద్రమానం అనుసరించే తెలుగువారికి శ్రావణమాసం చాలా విశేషమైంది. మంగళవారాల్లో గౌరీదేవిని, శుక్రవారాల్లో లక్ష్మీదేవిని ఆరాధిస్తారు. ప్రత్యేకించి స్త్రీలు ముత్తయిదువలను ఇంటికి ఆహ్వానించి వాయినాలు అందిస్తారు. శ్రావణమాసంలోనే శ్రీకృష్ణాష్టమి, గాయత్రీజయంతి వంటి పర్వదినాలు వస్తాయి.

➠ సత్యనారాయణ వ్రతం చేయడం తెలుగువారి సంప్రదాయం. వ్రతం చేసినవారికి అంతా శుభమే జరుగుతుందని నమ్మకం. అన్నవరం దివ్యక్షేత్రంలో ఆ స్వామి వెలిసిన పవిత్రదినాన (జూలై 22) ఆవిర్భావోత్సవాలు జరుగుతాయి.

➠ ప్రకృతిలోని ప్రతి అణువూ జగన్మాత స్వరూపమే. అందుకే ఆమెను ప్రకృతి స్వరూపిణిగా శాస్త్రాలు వర్ణిస్తున్నాయి. తన బిడ్డల వంటి భక్తుల క్షుద్బాధను తీర్చటానికి ఆ తల్లి తానే స్వయంగా అన్నిరకాల కూరగాయలను ఆభరణాలుగా ధరించి, శతాక్షిగా అవతరించింది. ప్రజలందరికీ సాంత్వన చేకూర్చింది. అందుకే ఆ తల్లి శాకంభరిగా భక్తుల నీరాజనాలు అందుకుంటోంది.

➠ గత శతాబ్దపు మహోన్నత యోగగురువుల్లో స్వామి శివానంద ఒకరు. చిన్మయానంద వంటి గురువులకు గురువు స్వామి శివానంద. ఆయన స్థాపించిన దివ్యజీవన సంఘం ప్రపంచవ్యాప్తంగా సాధకులకు మార్గనిర్దేశం చేస్తోంది. తెలుగునేలపై కూడా డివైన్ లైఫ్ సొసైటీ హైదరాబాద్ కేంద్రంగా విశిష్ట సేవలు అందిస్తోంది.

➠ సూర్యుడు కర్కాటకంలో ప్రవేశించే దక్షిణాయనం పుణ్యప్రదమైనది. మన ప్రధాన పండుగలన్నీ దక్షిణాయనంలోనే వస్తాయి. అయితే శుభకార్యాలను ఉత్తరాయణంలోనే నిర్వహించుకుంటాం. కానీ మనం శక్త్యారాధన, రుద్రారాధన, పితృదేవతారాధనలకు మాత్రం దక్షిణాయనమే ప్రధానం.

➠ ఆషాఢ మాసంలో కృత్తికా నక్షత్రం వున్న రోజున ఆడి కృత్తిక జరుపుకుంటారు. ఆడికృత్తికనాడు సుబ్రహ్మణ్య భక్తులు తమిళనాడులో ‘ఆరు పడైవీడు’గా ప్రసిద్ధిచెందిన ఆరు ప్రధాన క్షేత్రాలను దర్శించి విశేష పూజలు చేస్తారు. వీటిని ఒకేరోజులో దర్శించలేం. ఆడికృత్తిక నాడు శరవణ భవ నామంతో కలిపి ఈ క్షేత్రాల పేర్లను తలుచుకుంటే దర్శించిన ఫలం లభిస్తుంది.