➠ కంచికామకోటి పూర్వపీఠాధిపతి శ్రీజయేంద్ర సరస్వతీ మహాస్వామి 1935 జూలై 18న జన్మించారు. శ్రీచంద్రశేఖరేంద్ర సరస్వతీ మహాస్వామి వారసునిగా 1970 నుంచి ప్రారంభించి జీవిత కాలంలో 14 సార్లు విజయయాత్రలు చేపట్టారు. ప్రాచీన ఆలయాల జీర్ణోద్ధరణ గావించారు. కుంభాభిషేకాలు జరిపించారు. ఆదిశంకరాచార్యులు సంచరించిన ప్రదేశాలను గురించి జయేంద్రులు అపూర్వ పరిశోధనలు చేశారు. కంచిపీఠానికి ఎనలేని జనాదరణ తెచ్చిపెట్టారు. 2018 ఫిబ్రవరి 28న సిద్ధిపొందారు.  

➠ తిరుమల తిరుపతి స్వామికి నిత్య కల్యాణం పచ్చతోరణం. ఏడాది పొడవునా ప్రతిరోజూ ఏదో ఒక ఉత్సవం, వేడుక తిరుమల కొండపై నిర్వహిస్తూనే ఉంటారు. శ్రీవారి సన్నిథిలో ఆషాఢమాసంలో జరిగే ముఖ్యకార్యక్రమం ఆణివర ఆస్థానం. వార్షిక ఆదాయ వ్యయాల నివేదిక, పుష్పపల్లకీ సేవ ప్రధానంగా నిర్వహించే ఆణివర ఆస్థానం దక్షిణాయనం ప్రారంభదినం నాటి విశేష కార్యక్రమం.

➠ ఆషాఢ పూర్ణిమను సింహాచలంలో గిరిపున్నమి అని వ్యవహరిస్తారు. అక్షయ తృతీయ నుంచి నాలుగు విడతలుగా చందన సేవను స్వీకరించిన సింహాద్రి అప్పన్న గిరిపున్నమి నాటికి సంపూర్ణ రూపాన్ని ధరిస్తాడు. పున్నమికి ముందురోజు సాయంకాలం నుంచి 32 కిలోమీటర్ల దూరం కాలినడకన సింహాచల గిరి ప్రదక్షిణ చేసి వచ్చిన వేలాది భక్తులు పున్నమినాడు స్వామి దర్శనం చేసుకుంటారు. ఈసారి గిరిపున్నమి నాడే చంద్రగ్రహణం వస్తున్న కారణంగా మధ్యాహ్నం వరకే అప్పన్న దర్శనం ఉంటుంది.

➠ వికాసమే జీవనం సంకోచమే మరణం. మనపై మనకు విశ్వాసం, భగవంతుడిపై విశ్వాసం అనేవి పరిపూర్ణ వికాస మంత్రాలు. ముప్పై మూడు కోట్ల పౌరాణిక దేవతలపైన మీకు నమ్మకం ఉన్నా... మీపై మీకు ఆత్మవిశ్వాసం లేకపోతే నిష్కృతి ఉండదు అని చాటిన నిత్యచైతన్య స్ఫూర్తి స్వామి వివేకానంద.

➠ యతులకు అత్యంత ప్రధానమైనది గురుపూర్ణిమ. ఆరోజున ఆచార్యపీఠాలన్నీగురు ఆరాధనా కార్యక్రమాన్నినిర్వహించాలని నియమం. అదేరోజున చాతుర్మాస్య వ్రతం కూడా ప్రారంభమౌతుంది. నాలుగు నెలలపాటు కఠోర దీక్షానియమాలతో సంన్యాసాశ్రమంలోని వారంతా ఈ వ్రతాన్ని పాటిస్తారు. 

➠ పాలకడలిపై శేషతల్పం మీద శ్రీమహావిష్ణువు శయనించేకాలమే చాతుర్మాస్యం. తొలి ఏకాదశి (జూలై 20) నుంచి ఉత్థాన ఏకాదశి (నవంబర్ 15) వరకు మధ్యనున్న కాలమంతా పుణ్యకాలమని పెద్దలు చెబుతారు. ఆ సమయంలో చేసిన వ్రతాలు, దానాలు అధిక శుభఫలితాలను ప్రసాదిస్తాయి. అటువంటి పుణ్యకాలానికి ప్రారంభదినమైన తొలి ఏకాదశి  విశిష్టతలు....