మనోజవం మారుతతుల్యవేగం / జితేంద్రియం బుద్ధిమతాం వరిష్ఠం
వాతాత్మజం వానరయూధముఖ్యం / శ్రీరామదూతం శిరసానమామి

శ్రీరామదూత అయిన హనుమంతుడి పుట్టిన రోజు అయిన హనుమజ్జయంతిని జూన్ 1న తెలుగువారు నిర్వహించుకుంటారు. ఆరోజున ఆలయాలన్నీ భక్తులతో కిటకిటలాడతాయి. స్వామికి ఇష్టమైన తమలపాకు పూజలు, వడమాల సమర్పణలు విరివిగా జరుగుతాయి. విశేష క్రతువులు నిర్వహిస్తారు. హనుమంతుడు సంగీతప్రియుడు. రామనామ సంకీర్తనతో ఆయన సంతోషిస్తాడు. ఎక్కడ రామనామం వినిపిస్తుందో అక్కడ అంజలిబద్ధుడై, కన్నులనిండా ఆనందబాష్పాలు నింపుకుని హనుమంతుడు ఉంటాడని, ఆయన చిరంజీవి అని మనవారి నమ్మకం. ఈ హనుమజ్జయంతి శుభవేళ స్వామి అనుగ్రహ ఆశీస్సులు అందరిపైనా వర్షించాలని కోరుకుందాం. జూన్ 16న గంగాజయంతి వస్తోంది. దీనినే దశపాపహర దశమి అని కూడా పిలుస్తారు. ఒక్కసారి తనలో మునక వేసినంతనే మానవుల సకల పాపాలనూ గంగ తొలగించగలదని పెద్దలు చెబుతుంటారు. ఈ పుణ్యవేళలో గంగాస్నాన ఫలం అందరికీ లభించాలని కోరుకుందాం. 

ప్రపంచానికి భారతదేశం అందించిన అమూల్యమైన కానుక యోగశాస్త్రం. ఇది అత్యంత పురాతనమైన శాస్త్రాల్లో ఒకటి. పురాణకాలంనుంచి అనేక విధాలుగా కనిపిస్తుంది. యోగశాస్త్రంలో వందలకొద్దీ శాఖలున్నాయి. వాటిలో ముఖ్యంగా యోగాసనాలు, ప్రాణాయామం, ముద్రల వల్ల అనేక ఆరోగ్యలాభాలు కలుగుతాయని నేటి వైజ్ఞానికులు నిరూపిస్తున్నారు. ఏటా జూన్ 21న అంతర్జాతీయ యోగ దినోత్సవం జరుపుకుంటారు. 'యోగీభవ అర్జున' అన్న శ్రీకృష్ణుని సందేశాన్ని అమలు పరుద్దాం. చేతనైనంతలో యోగసాధనతో ఆరోగ్యకరమైన సమాజాన్ని తీర్చిదిద్దుకుందాం. ఆరుగాలం శ్రమించి ముక్కారు పంటలు పండించే రైతన్నలు నిర్వహించుకునే తొలి పండుగ ఏరువాక. వర్షాకాలం ప్రారంభానికి ముందుగా నేలను దున్నే సందర్భం ఇది. 'వానల్లు కురవాలి వానదేముడా' అంటూ రైతులు చేసే ప్రార్థనను ప్రకృతి ఆలకించాలని ఆశిద్దాం. అకాల వర్షాలు ఉండకూడదనీ, సకాలంలో పడే వర్షాలు భూమిని సస్యశ్యామలం చేయాలనీ కోరుకుందాం.