NOTE : ఇది కేవలం ఆన్‌లైన్ కాపీ. మీ ఇంటికి పుస్తకం పంపబడదు.

శరత్కాలమిది... ఇందులో ఆశ్వయుజ, కార్తికమాసాలు రెండూ వేటికవే ప్రత్యేకమైనవి. ఆశ్వయుజ మాసం సందర్భంగా ప్రస్తుతం శరన్నవరాత్రి ఉత్సవాలు మహోత్సాహంగా సాగుతున్నాయి. అమ్మవారి ఆలయాలన్నీ వెలుగులతో, వేదమంత్రాలతో వెలిగిపోతున్నాయి. అమ్మవారు రోజుకో అలంకారంతో శోభిస్తున్నారు. వివిధ అవతారాలతో భక్తులను అనుగ్రహిస్తున్నారు. విజయదశమి (అక్టోబర్ 2) నాటికి ఈ ఉత్సవాలు పతాకస్థాయికి చేరుకుంటాయి. ఆశ్వయుజమాసం చివరిలో దీపావళి పర్వదినం అక్టోబర్ 20న రానున్నది. దివ్యదీపావళి... చీకట్లు పోకార్చి, వెలుగులు పూయించే ఆనందకేళి. ప్రజలందరిలోనూ ఆనందోత్సాహాలు వెల్లివిరియగా బాణసంచా కాలుస్తూ సందడిగా పండగ జరుపుకుంటారు. ఈ దీపావళి అందరికీ ఆనందాలను, ఐశ్వర్యాలను ప్రసాదించాలని మనసారా కాంక్షిస్తున్నాము. 

ఇక కార్తికం హరిహరులకు ప్రీతిపాత్రమైన మాసం. శివుని వంటి దైవం, గంగకంటే పవిత్రమైన నది, కార్తికం వంటి పుణ్యమాసం మరొకటి లేవు అని పెద్దలు చెబుతుంటారు. ఆహ్లాదకరమైన ఈ కార్తికంలో శివాలయాల్లో ధ్వజస్తంభాలపై ఆకాశదీపాలు కొలువు తీరతాయి. ప్రతి గడపలోనూ సంధ్యాదీపాలు పలకరిస్తాయి. అసమానతలు, అరమరికలు లేకుండా ఒక చెట్టునీడన అందరూ కలిసిమెలిసి భోజనాలు చేయడం కార్తికంలో కనిపించే గొప్ప సంప్రదాయం. ఇక కార్తికంలో స్నానం, దీపారాధనం ప్రత్యేక విధులు. కార్తికంలో వెలిగించే సంధ్యాదీపం మనలోని అజ్ఞానపు చీకట్లను పోగొడుతుంది. కార్తికంలో ఒక్క దీపాన్ని వెలిగించినా చాలు అనంత పుణ్యఫలాలు లభిస్తాయి. అటువంటి పుణ్యఫలాలు మనందరికీ విరివిగా లభించాలని కోరుకుందాము. చెప్పాలంటే కార్తికం దీక్షామాసం. అయ్యప్ప స్వాములు చన్నీళ్ల స్నానాలతో, ఒంటిపొద్దు భోజనాలతో కార్తికాన్ని మరింత పవిత్రంగా చేస్తారు. 'స్వామియే శరణం అయ్యప్పా' అంటూ భజనలు కొనసాగుతాయి. ఆ స్వాముల దీక్షలు సఫలీకృతం కావాలని కోరుకుందాం.