NOTE : ఇది కేవలం ఆన్‌లైన్ కాపీ. మీ ఇంటికి పుస్తకం పంపబడదు.

గోష్పదీకృత వారాశిం మశకీకృత రాక్షసం
రామాయణ మహామాలా రత్నం వందే అనిలాత్మజం​

హనుమకు సాటిరాగల దైవం హనుమ ఒక్కడే! విలక్షణమైన వ్యక్తిత్వం ఆయనది. ఆదర్శ మానవుడిగా అవతరించిన శ్రీరాముడికి సమ్మినబంటుగా అంకితమైన వాడు. రామబంటు అయినా ఆ రామునికి దీటుగా సాటిలేని దైవంగా నిలిచాడు. ఆయన అసాధారణ శక్తి సంపన్నుడు. వినయం, వందనం, మాటపొందిక క్షుణ్ణంగా తెలిసినవాడు. కార్యశూరుడు. యుగయుగాలుగా ధర్మానికి వెన్నెముకగా నిలిచిన వాడు. తన గుణగణాలతో మానవాళికి పూజనీయుడై, ఊరూరా ఆలయాల్లో కొలువుతీరాడు. హనుమజ్జయంతి (మే 12) సందర్భంగా ఆ స్వామిని శరణువేడుదాం.

సమస్త మానవజాతి రుగ్మతలను బాపిన మహనీయుడు. బుద్ధుడు. కరుణ త్యాగం కలగలిసి మూర్తీభవించిన రూపం బుద్ధుడు. గౌతమ బుద్ధుడు శాక్యవంశంలో జన్మించి నేటికి రెండున్నర వేల సంవత్సరాలైనా ఆయన ఉపదేశాలు నేటికీ వన్నె తగ్గలేదు. బౌద్ధ సంప్రదాయం ప్రకారం బుద్ధత్వమనేది మానవీయతకు పరాకాష్ఠ. బౌద్ధం చెప్పే మహోన్నత గుణాల్ని మనసా, వాచా, కర్మణా ఆచరించడమే బుద్ధత్వం. బుద్ధ పూర్ణిమ (మే 1) సందర్భంగా గౌతమ బుద్దుని బోధనల సారాంశంపై సరికొత్త చూపును సారించాలి.

మే 25వ తేదీన దశపాపహర దశమి. మన పుణ్యనదుల్లో మొదటిదైన గంగ పుట్టినరోజు. మానవకోటి సకల కల్మషాలనూ గంగ కడిగి వేస్తుందని విశ్వసిస్తారు. అలా గంగ కడిగివేసే పదిరకాలైన పాపాలను ప్రక్షాళన చేసుకోవడానికి ఉద్దేశించినదే గంగాదశమి. ఆనాడు ఆ మాతను స్మరించి, నమస్కరిద్దాం. ఇంకా పవిత్ర వైశాఖమాసం ముగుస్తున్న వేళ వివిధ క్షేత్రాల్లో దేవీదేవతల ఉత్సవాలు, కల్యాణాలు జరగనున్నాయి. ఆ దేవతలందరూ మనల్ని చల్లగా కాపాడాలని మనసారా కోరుకుందాం.